اسلام آباد(وقائع نگار خصوصی)قائم مقام صدر صادق سنجرانی نے فنانس بل 24-2023 کی منظوری دے دی۔
”پاکستان ٹائم“کے مطابق ذرائع کا کہنا ہے کہ صادق سنجرانی نے فنانس بل پر دستخط کرتے ہوئے اس کی منظوری دے دی۔قائمقام صدر صادق سنجرانی کے دستخط سے بل بجٹ کی منظوری کا عمل مکمل ہوگیا ہے، فنانس بل 24-2023 آج صبح قومی اسمبلی سیکرٹریٹ نے منظوری کے لئے ایوان صدر ارسال کیا تھا۔واضح رہے کہ گزشتہ روز قومی اسمبلی نے فنانس بل کی منظوری دی تھی جس کے بعد اسے دستخط کے لئے صدر مملکت کو بجھوایا گیا تھا۔صدر عارف علوی کی حج کی ادائیگی کے دوران چیئرمین سینیٹ صادق سنجرانی قائم مقام صدر کے طور پر کام کریں گے۔
یہ بھی پڑھیں:اعتزاز احسن نے وزیر اعظم سے فوری استعفے کا مطالبہ کر دیا
قومی اسمبلی نے وزیرخزانہ کی جانب سے پیش کی گئی پٹرولیم ڈویلپمنٹ لیوی آرڈیننس میں ترمیم سمیت بجٹ 24-2023 کثرت رائے سے منظور کر لیا۔پٹرولیم ڈویلپمنٹ لیوی آرڈیننس میں ترمی کے بعد وفاق کو 60 روپے فی لیٹر تک لیوی عائد کرنے کا اختیار ہو گا۔فنانس بل 2023 میں مجموعی طور پر 9 ترامیم پیش کی گئیں جنہیں منظور کر لیا گیا۔ فنانس بل میں 8 ترامیم حکومت اور ایک ترمیم اپوزیشن کی منظور کی گئی۔
