اسلام آباد(سٹاف رپورٹر)بھارتی خفیہ ایجنسی را،بھارتی میڈیا اوربلوچ شدت پسندوںکاگٹھ جوڑ بے نقاب ہوگیا،بھارتی صحافی کے بلوچ دہشتگردوں سے ہمسایہ ملک میں موجود سہولت کاروں کے ذریعے رابطوں کا انکشاف ہوا ہے۔
پاکستان ٹائم کو موصول ہونیوالی اطلاعات کے مطابق بھارتی خفیہ ایجنسی را کے بلوچستان ڈیسک کے انچارج کرنل اشوک سے براہ راست رابطے میں رہنے والا بھارتی صحافی منیش رائے بلوچستان کے پرامن نوجوانوں کو بہکانے اور بلوچستان میں امن کی کوششوں کو سبوتاژ کرنے کے لیے مختلف پمفلٹس اورتربیتی دستاویزات کو پروپیگنڈا کے طور پر استعمال کر رہا ہے،منیش رائے نے متعدد بلوچ دہشت گردوں سمیت اعلی قیادت کے انٹرویوز بھی کئے ہیں جن میں بلوچ لبریشن فرنٹ کے گوہرام بلوچ،بلوچ نیشنل آرمی کے گلزار امام شمبے اور بلوچ لبریشن آرمی کےحربیار مری شامل ہیں۔منیش رائے ہمسایہ ملک میں موجود بلوچ دہشت گرد گروپوں کے سہولت کار عبدالجبار کریم زئی عرف راج دفتر کے ذریعے انٹرویو حاصل کرتا ہے۔منیش رائے تشدد کو فروغ دینے والے بلوچ دہشت گرد گروپوں کی جانب سے پروپیگنڈا رپورٹس مرتب کرنے کا بھی ذمہ دار ہے۔
