لندن (مانیٹرنگ ڈیسک)نشتر ہسپتال ملتان سے فارغ التحصیل تحصیل تونسہ کے گاوں بابی سے تعلق رکھنے والے پاکستانی ڈاکٹر عامر رضااور سرجنوں کی ٹیم نے لندن کے چیلسی اور ویسٹ منسٹر ہسپتال میں ایک ہی دن مین پیچیدہ امراض نسواں کے12 آپریشن کر کے ایک نیا ریکارڈ قائم کردیا۔ ”پاکستان ٹائم“ کے مطابق ڈاکٹر عامر رضا Endometriosis کے معالج کے طورپر مشہور ہیں۔ڈاکٹر عامر رضا نے روبوٹک سرجری کے ذریعے خاتون کا علاج کر کے حمل کو متاثر کرنے والے مرض Endometriosis میں مبتلا لاکھوں خواتین کے علاج کی راہ ہموار کردی۔ اس مرض میں مبتلا خاتون کا نہ صرف پیڑو متاثر ہوتا ہے بلکہ اس سے اس کا پیٹ، بلاڈر اور نروس سسٹم بھی متاثر ہوتا ہے اور ہر عمر کی خواتین اس سے متاثر ہوسکتی ہیں، ہر سال لاکھوں خواتین اس مرض سے متاثر ہوتی ہیں۔ روبوٹک سرجری کی ہول سرجری کا انتہائی جدید طریقہ ہے، جس میں سرجن مریض کے پیٹ میں چھید کر کے علاج کرتا ہے، اس طریقہ علاج میں ڈاکٹر کسی فاصلے پر بیٹھ کر آلات پر کنٹرول کے ذریعہ آپریشن کے فرائض انجام دیتا ہے۔ ڈاکٹر عامر ان دنوں لندن کے معروف کرام ویل ہسپتال کے Endometriosis انٹرنیشنل سینٹر کے ڈاکٹر ہیں اور مختلف امراض کے ماہر ڈاکٹروں کی ٹیم کے سربراہ ہیں۔ وہ minimal access سرجری چیلسی سینٹر CCMIG سینٹر کے بانی ڈائریکٹر بھی ہیں، اس سینٹر سے پوری دنیا میں laparoscopic کے کورس کرائے جاتے ہیں، وہ laparoscopic کی تعلیم اور تربیت دینے کیلئے مشرق وسطیٰ، پاکستان، افریقہ اور یورپ کے دورے کرچکے ہیں۔
