کراچی (سپورٹس ڈیسک ) قومی ٹیم کے کپتان بابر اعظم نے کہا ہے کہ اکیڈمی جانے کیلئے بس کا کرایہ بھی نہیں ہوتا تھا، پیدل جایا کرتا تھا اور کبھی بس میں رش کی وجہ سے کرایہ نہ دے کر بچائے پیسوں سے سموسے کھالیا کرتا تھا۔
پاکستان کرکٹ بورڈ (پی سی بی ) کے یوٹیوب چینل پر بابر اعظم کا انٹرویو شیئر کیا گیا ہے جس میں بابر اعظم کو اپنے کرکٹ کے سفر کے دوران پیش آنے والے اتار چڑھا وپر بات کرتے ہوئے دیکھا جاسکتا ہے۔ دوران انٹرویو بابر اعظم نے بتایا کہ جس دن قومی ٹیم کیلئے باضابطہ طور پر کھیلنے کی کال آئی اس دن مجھ سمیت میری فیملی بے حد خوش تھی، بطور پاکستانی پلیئر اسٹیڈیم میں جب پہلی بار میچ کھیلنے آیا تب بھی مجھے کرکٹ میں اپنے سفر کا آغاز یاد آگیا تھا وہ آغاز جب میں بال پِکر بن کر سٹیڈیم میں آتا تھا۔ انٹرو یو کے دوران کپتان بابر اعظم کا کہنا تھا کہ آج جو بھی کچھ ہوں اس کے پیچھے سخت محنت اور جدوجہد ہے، کرکٹ کے سفر کے دوران صبح صبح اکیڈمی پہنچ جاتا تھا اور پھر شام کو واپس آتا تھا، اس وقت اکیڈمی جانے کیلئے بس کا کرایہ بھی نہیں ہوتا تھا ، کبھی پیدل چلا جاتا تھا اور کبھی واپسی جگاڑ لگالیا کرتا تھا۔ قومی ٹیم کے کپتان کا کہنا تھا کہ واپسی پر بس میں کبھی کبھی بہت رش ہوتا تھا تو بچ بچا کر بس کا کرایہ بچالیتا تھا اور پھر ان پیسوں سے اپنے علاقے میں سموسے کھالیتا تھا۔
