اسلام آباد(ہیلتھ رپورٹر)پاکستان میں منکی پوکس کا پہلا کیس سامنے آ گیا،گزشتہ روز قومی ادارہ برائے صحت اسلام آباد نے سعودی عرب سے بے دخل شخص میں منکی پاکس کی تصدیق کی تھی۔ملک کے تمام ایئرپورٹس پر ہائی الرٹ جاری کردیا گیا ۔
”پاکستان ٹائم“ کے مطابق وزارت صحت کے حکام نے تصدیق کرتے ہوئے بتایا ہے کہ سعودی عرب سے بے دخل کیے جانے والے شخص میں منکی پاکس پایا گیا ہے۔انہوں نے بتایا کہ پمز حکام نے متاثرہ شخص کے نمونے قومی ادارہ برائے صحت بھیجے جنہوں نے منکی پاکس کی تصدیق کی۔منکی پاکس کے پہلے کیس کے بعد پورے ملک کے ائیرپورٹ پر ہائی الرٹ کر دیا گیا ہے۔وزارت صحت کے مطابق بیرون ملک سے آنے والے مشتبہ مریضوں کے نمونے قومی ادارہ برائے صحت بھیجنے کا حکم دیا گیا ہے۔ملک میں منکی پاکس وائرس کے پھیلاو¿ کے خدشے کے پیش نظر بیرون ملک سے آنے والے مشتبہ مریضوں کی سکرینگ کا فیصلہ کیا گیا ہے، اس سلسلے میں ایئرپورٹس کو ہدایت نامہ جاری کیا گیا ہے۔ وفاقی محکمہ صحت کی جانب سے ایئرپورٹس پر متعلقہ محکموں کو گائیڈ لائینز پر عملدرآمد کی ہدایت کی گئی ہے۔ہدایت نامے میں کہا گیا ہے کہ طیارے میں موجود مشتبہ مریض کی نشاندہی کی جائے۔ مشتبہ مریض کو روٹین کے ڈیپارچر کی بجائے ایمبولینس کے ذریعے نکالا جائے، متاثرہ مریض کی امیگریشن ایئرلائن سٹاف کروائے گا، مریض کے سفری دستاویزات باقاعدہ لفافہ میں بند کر کے لائے جائیں، جبکہ وائرس کے خطرے کے پیش نظر ایئر پورٹس پر پروٹوکول سروس فوری بند کی جائے، محکمہ صحت کے اہلکار مسافروں کے سامان پر جراثیم کش سپرے کریں، محکمہ صحت کے اہلکار حفاظتی پی پی ای کٹس لازمی استعمال کریں، عمرہ سے آنے والے ہر ایک مسافر کو چیک کیا جائے۔
