لاہور(سٹاف رپورٹر) پاکستان مسلم لیگ ق کے صدر چودھری شجاعت حسین نے کہا ہے کہ ملک کسی صورت اداروں میں تقسیم در تقسیم کا متحمل نہیں ہو سکتا ، سیاسی اختلافات کو پسِ پشت ڈال کر ملک کے وسیع تر مفاد کیلئے تمام سیاسی قوتوں کو ایک ساتھ اکٹھے بیٹھنا چاہیے، ناممکنات میں سے ممکنات کے امکانات پیدا کرنا ہی سنجیدہ اور زیرک سیاسی قائدین کا خاصہ ہے۔
”پاکستان ٹائم“ کے مطابق لاہور میں پاکستان مسلم لیگ کے سربراہ اور سابق وزیراعظم چوہدری شجاعت حسین کی سربراہی میں سیاسی بحران کے حوالے سے مشاورتی اجلاس ہوا جس میں پارٹی کے چیف آرگنائزر چوہدری محمد سرور، جنرل سیکرٹری طارق بشیر چیمہ،پارٹی کے نائب صدر چوہدری سالک حسین اور جنرل سیکرٹری پنجاب چوہدری شافع حسین نے شرکت کی۔ اجلاس میں موجودہ سیاسی صورتحال، پنجاب میں انتخابات کے لئے پارٹی ٹکٹوں کی تقسیم بارے مشاورت کی گئی۔ اجلاس میں پنجاب کے انتخابی معرکے کے لئے اچھے امیدواروں کو پارٹی ٹکٹیں دینے کا فیصلہ کیا گیا۔ پاکستان مسلم لیگ نے پارٹی ٹکٹس کی تقسیم کا سلسلہ شروع کر دیا، اجلاس میں مفاہمتی عمل کے لئے پارٹی کی چار رکنی مذاکراتی کمیٹی بنانے کا بھی فیصلہ کیا گیا۔ چار رکنی کمیٹی میں چوہدری سرور، طارق بشیر چیمہ، چوہدری سالک حسین اور چوہدری شافع حسین شامل ہیں۔اس موقع پر پارٹی کے چیف آرگنائزر چوہدری محمد سرور نے کہا کہ پاکستان مسلم لیگ نے پورے ملک میں ایک ہی روز انتخابات چاہتی ہے، ایک روز انتخابات نہ ہونے کی صورت میں سیاسی بحران میں مزید اضافہ ہو گا،پنجاب میں الیکشن کے حوالے سے پارٹی ٹکٹس جلد الیکشن کمیشن میں جمع کروا دیں گے، چوہدری سرور نے کہا کہ پارٹی کو منظم کرنے کا سلسلہ جاری ہے، معروف سیاسی شخصیات پارٹی میں شامل ہو رہی ہیں۔
