اسلام آباد(وقائع نگار خصوصی) پاکستان تحریک انصاف(پی ٹی آئی) کے ہیڈ آف میڈیا افیئرز اور سابق وفاقی وزیر اطلاعات فواد چودھری نے کہا ہے کہ حکومت کا یہ موقف حیران کن ہے کہ پاکستان دہشت گردوں کے رحم و کرم پر ہے،وزیر اعظم شہباز شریف کو اپنی ناکامی تسلیم کرتے ہوئے مستعفی ہو جانا چاہیے۔
”پاکستان ٹائم“ کے مطابق فواد چوہدری نے وزیراعظم شہباز شریف سے استعفے کا مطالبہ کرتے ہوئے استفسار کیا ہماری معیشت اور سیکیورٹی حالات اتنے خراب ہیں کہ انتخابات تک ممکن نہیں ؟ ایسے مو¿قف کے بعد وزیر اعظم کو ناکامی تسلیم کرتے ہوئے مستعفی ہو جانا چاہیے۔سابق وفاقی وزیر فواد چودھری نے کہا قومی سلامتی کمیٹی ایک قانونی ادارہ ہے، کمیٹی کا بنیادی مقصد سلامتی کی صورتحال پر غور کرنا ہے، فورم کے اعلامیے میں خود کو سیکیورٹی معاملات تک محدود رکھنا خوش آئند ہے، فورم حکومتی سیاسی جماعتوں کے ایجنڈے کا حصہ نہیں بنا۔ فواد چودھری نے کہا آئین کے مطابق تمام ادارے انتخابات کے حوالے سے سپریم کورٹ کے فیصلے کے پابند ہیں، سیکیورٹی فراہم کرنا اور انتخاب کیلئے فنڈز کی فراہمی اہم قانونی فریضہ ہے، حکومتی ادارے اس ضمن میں اقدامات کریں۔
