اسلام آباد(سٹاف رپورٹر) چیئر مین پاکستان تحریک انصاف (پی ٹی آئی)عمران خان نے وزیر داخلہ رانا ثنا اللہ کے دھمکی آمیز بیان سے متعلق اسلام آباد ہائیکورٹ میں درخواست دائر کر دی ہے، درخواست میں وفاقی حکومت ، آئی جی اسلام آباد اور ایس ایس پی آپریشن کو فریق بنایا گیا ہے ۔
” پاکستان ٹائم “کے مطابق اسلام آباد ہائیکورٹ میں دائر درخواست میں کہا گیا ہے کہ رانا ثنا اللہ نے ایک انٹرویو میں ڈائریکٹ دھمکیاں دی ہیں، فریقین کو میری گرفتاری کے ذریعے اپنے منصوبے پر عمل درآمد سے روکا جائے۔
واضح رہے کہ گزشتہ روز نجی ٹی وی کو انٹرویو میں وفاقی وزیر داخلہ رانا ثنااللہ نے کھلی وارننگ دیتے ہوئے کہا تھا کہ اب عمران خان یا ہم میں سے کوئی ایک بچے گا، عمران خان نے سیاست کو وہاں لاکر کھڑا کردیا ہے کہ اب دونوں میں سے ایک کا وجود ہی باقی رہنا ہے، اس لیے جب ہم سمجھیں گے کہ ہمارے وجود کی نفی ہو رہی ہے تو ہم ہر اس حد تک جائیں گے، جہاں یہ نہیں سوچا جاتا کہ یہ کام کریں یہ نہ کریں یہ جمہوری ہے اور یہ غیرجمہوری ہے، یہ اصولی ہے اور یہ غیر اصولی، یہ چیزیں ختم ہوجاتی ہیں۔
