اسلام آباد(وقائع نگار)وزیر دفاع اور پاکستان مسلم لیگ ن کے مرکزی رہنما خواجہ محمد آصف نے کہا ہے کہ سابق وزیراعظم نواز شریف جلد وطن واپس آرہے ہیں لیکن میں تاریخ نہیں بتاو¿ں گا، نواز شریف کے واپس آنے کے بعد بہت بہتری ہوگی، سارا ملک سیلاب کی طرح کرپشن میں ڈوبا ہوا ہے۔
”پاکستان ٹائم“ کے مطابق نجی ٹی وی سے گفتگو کرتے ہوئے وزیر دفاع خواجہ محمد آصف کا کہنا تھا کہ جب سے پاکستان ڈیموکریٹک موومنٹ(پی ڈی ایم) بنی تب سے ہم نے کوئی ایسی بات نہیں کی جو آئین کے خلاف ہو،ہمیں تباہ حال معیشت ملی جسے بہتر کرنے میں وقت لگے گا،سارا ملک سیلاب کی طرح کرپشن میں ڈوبا ہوا ہے،پوری کوشش کر رہے ہیں کہ معیشت اپنے پاوں پر کھڑی ہو جائے اور کرپشن پر قابو پالیں۔خواجہ آصف نے پاکستان تحریک انصاف(پی ٹی آئی)کے سربراہ پر کڑی تنقید کرتے ہوئے کہا کہ عمران خان کا بیانیہ اب نہیں چلے گا،سازش کا سفر امریکہ سے شروع ہوا جو بعد میں محسن نقوی،آئی جی پنجاب اور آئی جی اسلام آباد پر آ گیا،عمران خان چاہتا ہے دوبارہ اقتدار ملے اور خاندان سمیت کرپشن کرنے کا موقع ملے،یہ وہ مافیا ہے جس نے چار سال پاکستان کو لوٹا اور اب احتساب سے بچنا چاہتے ہیں۔
