لاہور(وقائع نگار خصوصی)پاکستان مسلم لیگ ن کی سینئر نائب صدر مریم نواز شریف نے پاکستان تحریک انصاف(پی ٹی آئی )کے سربراہ عمران خان کو ہدف تنقید بناتے ہوئے کہا ہے کہ مجھے”نانی“کہنے والے نے اچھے کام کئے ہوتے تو آج خود وہ”نانا،دادا“ہوتا،عمران خان کو بیساکھیوں کے استعمال کی عادت ہے،جو لوگ اس کا ساتھ دے رہے ہیں ان کی عقل پر میں حیران ہوں۔
”پاکستان ٹائم “ کے مطابق لاہور میں یوتھ کنونشن سے خطاب کرتے ہوئے مریم نواز شریف کا کہنا تھا کہ ایک لیڈر قوم کے نوجوانوں کو آگے کر کے گھر میں چھپا بیٹھا ہے،نو جوانوں کو ڈھال بنایا جاتا ہے،گزشتہ روز ان کے سیاسی کارکنوں نے پولیس کی گاڑیاں جلائیں،پولیس اہلکاروں پرڈنڈے برسائے،دنیا کی پہلی تحریک دیکھی ہے جس میں لیڈر چھپ کر بیٹھا ہو،اس سے بڑا مذاق اورکیا ہوگا،یہ مجھے نانی کہتے ہیں،اگر اچھے کام کیے ہوتے تو آپ بھی نانا دادا ہوتے،آخرت میں ہی نہیں دنیا میں بھی گناہوں کی سزاملتی ہے،عمران خان کے خلاف کوئی کیس بھی جھوٹا نہیں،انہوں نے توشہ خانہ سے چوریاں کی اور چھپائیں،اب ریلی کیلئے تیار لیکن عدالتی پیشی پر جان کو خطرہ ہو جاتا ہے،کیسز سے بچنے کیلئے پلسٹر نہیں اتار رہے،مجھے اور نوازشریف کو بھی کئی مرتبہ دھمکیاں ملیں لیکن ہم نہیں ڈرے اور عدالتوں میں پیش ہوئے۔
انہوں نے کہا کہ عمران خان کے خلاف چار کیسزہیں،ایک تو اس کی بیٹی کا ہے کیوں کہ وہ اپنی بیٹی کو اون نہیں کرتا، اس کی سابقہ بیوی جمائمہ اس کی بیٹی کو پال رہی ہے،اس نے اپنی بیٹی کے بارے میں قوم سے جھوٹ بولا، 190 ملین پاونڈ کا کیس،فارن فنڈنگ اور توشہ خانہ یہ سب کیسز سچے ہیں،عدالت انہیں باربار بلا رہی ہیں لیکن یہ حاضر نہیں ہو رہا ہے،ان کیسز سے بھاگتا رہتا ہے،ڈرامہ بازی اس لیے کر رہا کہ وہ کورٹس میں نہیں جانا چاہتا،عمران خان کو بیساکھیوں کے استعمال کی عادت ہے،جو لوگ اس کا ساتھ دے رہے ہیں ان کی عقل پر میں حیران ہوں،انتخابات کے سارے پیسے عمران خان سے وصول کیے جائیں،یہ بیماریوں کے پیچھے چھپ رہے ہیں،کورٹس کے لیے بیمار مگر ریلیز کے لیے تیار،اس کو کورٹس میں جان کو خطرہ ہے مگر ریلی میں خطرہ نہیں،ریلی میں ہزاروں شرکا ہوتے ہیں جہاں جان کو زیادہ خطرہ ہوتا ہے،پاکستان کے ہر نوجوان کو انتخابات میں سوچ سمجھ کر فیصلہ کرنا ہے۔
مریم نواز کا کہنا تھا کہ ملک کو اس وقت یوتھ کی ضرورت ہے،پاکستان کی آبادی میں نوجوانوں کا بہت بڑا تناسب ہے،اگر کسی جماعت کے پاس پاکستان کی ترقی کا پلان ہے تو وہ ن لیگ ہے،باقی جماعتیں صرف دعوے کرتی ہیں، یوتھ پاکستان میں سب سے بڑے سٹیک ہولڈرزہیں،نوجوانوں کو فری لانس کی ٹریننگ کروانی چاہیے،زراعت کے شعبے میں نوجوانوں کی حوصلہ افزائی کرنی چاہیے، 99 فیصد یوتھ قرضے واپس کرتے ہیں،حکومت کی ذمہ داری ہے کہ نوجوانوں کو موقع دیں،اس وقت بھی ینگ پارلیمنٹیرین کی سب سے بڑی تعداد مسلم لیگ ن کی ہے،امید ہے کہ آنے والی پارلیمنٹ میں سب سے بڑی تعداد یوتھ کی ہوگی۔
