لاہور(کورٹ رپورٹر)پاکستان تحریک انصاف(پی ٹی آئی) نے صوبائی دارالحکومت میں دفعہ 144 کے نفاذ اور کارکنان کے خلاف پولیس ایکشن کو لاہور ہائیکورٹ میں چیلنج کردیا۔
”پاکستان ٹائم “ کے مطابق تحریک انصاف کی جانب سے لاہور ہائی کورٹ میں دفعہ 144 کے خلاف درخواست دائر کردی گئی ہے۔رہنما تحریک انصاف حماد اظہر کی جانب سے ظفراقبال منگن ایڈووکیٹ کے توسط سے دائر کی گئی درخواست میں حکومت پنجاب،محکمہ داخلہ،ڈپٹی کمشنر لاہور اور دیگر کو فریق بنایا گیا ہے۔درخواست میں موقف پیش کیا گیا ہے کہ پرامن احتجاج ہر شہری کا بنیادی حق ہے،انتخابی مہم سے روکنے کیلئے دفعہ 144 کا غیر قانونی نوٹیفکیشن جاری کیا گیا،عدالت دفعہ 144 کے نفاذ کو کالعدم قرار دے۔درخواست دائر کرنے کے بعد میڈیا سےگفتگو کرتے ہوئے پی ٹی آئی رہنما میاں حماد اظہر کا کہنا تھا کہ ہمارے سینکڑوں کارکنان کو گرفتار کرلیا گیا ہے،ہمارے کارکنان پر کیمیکل والا پانی پھینکا گیا جس سے درجنوں افراد زخمی ہوکر ہسپتالوں میں زیر علاج ہیں،پر امن شہریوں کی گاڑیوں کو توڑا گیا،نگران حکومت میں غیرجمہوری کام کیا گیا ہے۔
دوسری جانب لاہور میں پی ٹی آئی کی ریلی روکنے کیلئے پولیس ایکشن کے خلاف لاہور ہائیکورٹ میں ایک اور درخواست دائر کر دی گئی ہے۔درخواست پی ٹی آئی کے رہنما امتیاز محمود نے وقار مشتاق طور ایڈووکیٹ کے توسط سے دائر کی ہے،جس میں پولیس کی جانب سے شہر کے راستوں کی بندش اور آنسو گیس شیلنگ کے اقدام کو چیلنج کیا گیا ہے۔درخواست میں حکومت پنجاب،ڈی سی اور سی سی پی او لاہور کو فریق بناتے ہوئے موقف پیش کیا گیا کہ پی ٹی آئی نے انتخابی مہم،کے لئے ضلعی انتظامیہ سے اجازت نامہ لیا لیکن پولیس نے انتخابی مہم کیلئے ریلی نکالنے سے قبل ہی راستے بند کرکے غیر قانونی اقدام کیا۔درخواست میں موقف اختیار کرتے ہوئے استدعا کی گئی ہے کہ پولیس نے سیاسی کارکنوں کو آنسو گیس کے ذریعے تشدد کا نشانہ بنایا،پر امن احتجاج ہر شہری کا بنیادی حق ہے،عدالت انتظامیہ کی جانب سے راستوں کی بندش اور آنسو گیس شیلنگ کے اقدام کو کالعدم قرار دے۔
یاد رہے کہ نگران حکومت پنجاب کی جانب سے لاہور میں دفعہ 144 نافذ کردی گئی ہے اور اس کا اطلاع 7 روز کے لئے ہوگا۔تحریک انصاف کی جانب سے لاہور میں ریلی کا اعلان کیا گیا تھا تاہم آج ہی شہر میں دفعہ 144 نافذ ہونے کے باعث پی ٹی آئی کے کارکنان اور پولیس کے مابین متعدد جگہ پر تصادم دیکھنے میں آیا، پولیس کی جانب سے دفعہ 144 کی خلاف ورزی پر کارکنان کی گرفتاریاں بھی کی جارہی ہیں۔
